O le faaiuga o le vaiaso na tea nei i le tuanai o tafega ma lologa na aafia ai se vaega o le motu o Savaii i le taeao o le Aso Tofi ua mavae, na faatoa iloa ai i lipoti mai Salafai nisi o maota ma laoa o aiga na faaleagaina i tafega.
Na faatoa manino ai foi vaega tonu o auala tetele ua faaleagaina ona o le malosi o tafega i Lano ma Saipipi.
O le faaiuga o le vaiaso sa malaga ai le pulega o fela’ua’iga i luga o le laueleele ma le Minisita o galuega tetele ma fela’ua’iga e asiasi i vaega o Savaii na afaina ma o loo faia nei tapenaga mo le toe fausia o vaega o auala ua faaletonu ma tafia i le malolosi o tafega ma lologa.
E iai le talitonuga o le a silasila le Kapeneta i le lipoti o mea na faaleagaina e aofia ai maota ma laoa o nisi o aiga na aafia, ona faatoa iloa ai lea o se fuafuaga pe iai se fesoasoani mo aiga ua aafia fale nofo i uiga faaletonu o le tau sa iai lena vaiaso ua mavae.
I le vaega o le pulega o faalavelave faafuasei faalenatura le NEOC e lei maua mai lava se faamatalaga mai le ofisa tutotonu i Tuanaimato.
