Faateia nisi o sui faatutū e iai o latou pito Saina ina ua vaaia le faaleagaina o vaega o o latou ata o loo i luga o billboards poo laupapa faailo i nisi vaega o le atunuu.
Fai mai ua faaaoga le vali lanu paepae e tape ai foliga tulou o latou ia mai laupapa faailo ia mo le faigapalota faalotoifale o loo tapena nei.
Ua taua i lipoti a le One News se finagalo faaalia o le tasi o councillor mai Howick, Paul Young lea o loo toe tausinio foi e faatumau lona nofoa, na ia taua pe a ma le silia ma le 20 laupapa faailo ua faaleagaina ai pe valivali ai lona ata ma e le o le taimi muamua foi lea ua faaleaga ai lona ata ae ua sili atu la ona ogaoga le faaleagaina ua iai i le taimi nei nai lo tausaga ua tuanai.
Fai mai a ia o nei gaioiga faailogalanu o ni faiga le manuia tele ma e manatu ia o le aoaoina o se auala aupito sili lea mo le tali atu i lenei ituaiga gaioiga. O lona popolega ina nei avea le tulaga lea ma ala e faavaivai ai nisi o sui fou mai le tamomoe i le palota ona o le popole i lea tulaga.
Fai mai Young o Niu Sila o lona aiga lea ma e matuai le taliaina le faaleagaina o laupapa faailo. Na taua foi e Young o ia ua 33 tausaga o avea Niu Sila ma ona aiga. O loo feagai leoleo ma le suesuega o lenei mataupu.
