Ua faalauiloa mai e le afioga i le Tamaitai Palemia, Fiame Naomi Mataafa i lana faasilasilaga aloaia i le afiafi nei, nisi o tofiga taualoa o Sui o Samoa i Niu Sila.
Ua faamaonia le tofia e le Kapeneta o le Afioga Afamasaga Faamatala Toleafoa e avea ma Komesina Maualuga o Samoa i lona ofisa i Ueligitone.
E le fou lenei tofiga i le afioga Afamasaga e pei foi ona sa tofia ai i nei tofiga faakonesula o Samoa i le feagai ai ma malo tetele i nisi o tausaga ua mavae. Sa tofia le afioga Afamasaga e avea ma Konesula Aoao o Samoa i Aukilani i le tausaga 1984, ona avea lea ma Amepasa o Samoa i Peleseuma mai le 1989 i le 1997.
Ua tofia foi e le Kapeneta le afioga Afemata Palusalue Faapo II, e avea ma Konesula Aoao o Samoa i Aukilani. O le afioga Afemata sa galue e le gata o se Minisita o le Kapeneta, o se faipule, ae sa avea foi o le Taitai o le vaega faaupufai a le Tautua Samoa i ni tausaga ua mavae. O se tamalii e faaaloalogia e le gata i le malo ma ona upufai ae faapea foi i nuu ma afioaga.
Ua toe tofia e le Kapeneta le susuga Vaatu’itu’i Apete Meredith e avea ma Komesina o Fefaatauaiga a Samoa i Aukilani. O se tamalii e telē lona agavaa ma tomai e faatino ai lenei tofiga auā sa galue ai muamua, aemaise le uunaia o avanoa o fefaatauaiga o oloa a Samoa i Niu Sila.
