O le falelalaga lea a le Aiga Sa Loaū i Faleula lea na faatautaia i le asō le latou faalelegapepe e faalele ai a latou measina na galulue ai tina ma tamaitai o le aiga e tuufaatasia.
O nei galuega e tele lava i ie tosi 1 lea ua 21 a latou ie ua maea ona iai i lea vaega ae 2 ie 15 aga i le tosi 3. O le unai a le falelalaga i le au lalaga ina ia faaauau ona faia nei ituaiga ie ona o le manaomiaga ua iai nei i mea fai a le atunuu.
Ua silia ma le 20 tausaga talu ona faavae mai lenei falelalaga ma ua toa 38 tina ma tamaitai o le aiga o loo nafa ma lea matafaioi.
Taua e le faauluuluga o lea falelalaga o le lalagaina o ie tosi 1 ma le 3 e le’o se galuega faigofie ma o lona taui foi e ese ma le suamalie. O ietoga ia ua tele ina manuia ai aiga o le toatele aua o le tupe e maua mai ai pe a faatau atu.E le gata i lea o le faatumauina pea o le agavaa i le lalagaina o measina a Samoa.
O le naunautaiga lava ina ia faaaupegaina nisi o fanau tamaitai ina ia iloa fai le galuega ma saga fa’aauau ai pea le iai o nei measina a le atunuu.
O lenei tapenaga a le falelalaga e sauni atu ai mo le faalelegapepe tele a le atunuu lea o le a faia i le masina o Tesema i le tausaga nei.
