O se tasi o vaega mo le patipatia ai e le itumalo o Gaga’emauga Nu.1 o le 60 tausaga o le tut’oatasi o Samoa lea na afua ai le latou faalauiloa poo le Talomua ua faaigoaina o le Uluai Seleselega (first harvest). 

O lenei faalauiloa na faia i le lotoā o le Aoga Tulagalua a le afioaga o Samalaeulu i Savaii ma na molimauina e le afioga i le Sui Palemia o le sui Faipule foi lea o Gaga’emauga Nu.1, Tuala Tevaga Iosefo Ponifasio faapea minisita o le Kapeneta. Ae lē gata i lea o le mata’ina o le tali atu o sui o le afioaga faapea sui o nuu tulalata ifo i le famoemoe a le itumalo. 

I le saunoaga a le Minisita o Faato’aga ma Faigafaiva, Laauli Leuatea Polataivao Fosi Schmidt na ia faasoa ai i le tāua o nei atina’e faalauiloa ina ia mafai ona faaali ai galuega a faifaato’aga e ala ia latou atina’e eseese. 

E lē gata i lea o le tāua o le gaosi ma totō lava i totonu o laufanua o Samoa fualaau’aina ma fualaau faisua mo meataumafa nai lo o le faatau o meaai e maua ai i ma’i lē pipisi e pei o le tino puta, suka ma le toto maualuga.