Ua faalauiloa nei le maea fausia o le nofoaga e faafailele ai limu fuafua, faisua ma i’a ole tilapia o se galuega na faatupe e le Malo o Iapani, ma ua fausia i Toloa o le nofoaga ile aga’i i Muifanua, ma e silafia foi e nisi ona sa faagaioia ai le a’oga mo seila i ni tausaga ua tuanai.
O le tasi lea o taumafaiga a le Matagaluega o Faatoaga ma Faigafaiva, ua iai le talitonuga o le Minisita le susuga Laauli Leuatea Polataivao Fosi Schmidt, o le a mafai ona faateleina ai limu fuafua lelei mo le tausiga o le tino soifua maloloina, ae o le itu sili o le a faateleina ai mo le faatau atu i tagata aua le fofoga taumafa.
O le fono a atunuu laiti sa usuia i lo tatou atunuu ile vaiaso na tea nei sa tautalagia ai i mataupu sa talanoaina le taua o le faia oni fofō ini auala gafataulimaina e faatumau ai le tele o taumafa, ma ia saili foi ni auala e togafiti ai lu’itau o suiga o le tau, ua mafua ai nisi o faaletonu ua aafia ai le tulaga maua pea o taumafa mai le siosiomaga faalenatura o atunuu laiti e pei o Samoa.
Ole nofoaga ua faafofoa ai le limu fuafua, faisua ma le i’a o le tilapia, o se isi lea o fatu o fuafuaga a le Matagaluega o Faatoaga ma Faigafaiva ile tapenaina o le tatou atunuu ile atiina a’e o ia taumafa e faigofie ma taugofie lona faagaioia ina ia fesoasoani ile tulaga maualuga o le tau o le soifuaga ona o oloa mai fafo ua tele ina faalagolago iai tagata.
O se tasi lea o poloketi na mafua ona tapena ona o aafiaga o atunuu mai le faamai koviti 19 ma o se taumafaiga o loo lotolotoi ai ma le UNDP o se faalapotopotoga mo polokalame o le atiina a’e a Malo Aufaatasi.
