O le siitia o le auaunaga o loo faatino e le Matagaluega o Puna’oa Faalenatura ma Siosiomaga ua faalauiloa ai se tasi o vaega tāua o lana tautua i le atunuu, o le Upega Tafailagi e maua ai soo se faamatalaga tāua ma aogā e silafia ai e le lautele o le atunuu matafaioi i le faia o galuega e fitoitonu ma lea matagaluega a le Malo.
O le tasi vaega tāua o lea upega tafailagi poo se website o le faalauiloa ua faaigoaina o le Samoa Cares e autu i le aoaoina o fanau o tupulaga ma tagata lautele i le tāua o auala e faasao ma puipuia ai lo tatou siosiomaga.
O le tasi itu tāua o le auaunaga a lea matagaluega ua faalauiloa, o le masini e vili ai le manava o le eleele e le gata e maua ai le suavai, ae maua ai le palapala mo suesuega o ituaiga o eleele o loo maua i vaega eseese o le atunuu.
O le Minisita o le Matagaluega o Puna’oa Faalenatura ma Siosiomaga le afioga Toesulusulu Cedric Schuster sa ia tatala aloaia ia vaega tāua o auaunaga a le matagaluega i se sauniga na faia i le fale samoa o le ofisa vaaitau i Mulinuu.
