O se suesuega sa faatinoina e faatatau i le depression i tupulaga talavou ia poo ni tulaga e mafatia ma faapopoleina ai, ua iloa ai o nisi o tulaga e pei o mafutaga ma matua aemaise lava i tina, mafutaga ma uo, meafai a aoga, o nisi ia o mafuaaga autu ua faaleo e le toatele na faia iai le suesuega.
Sa faaaoga i lenei suesuega pei ona lipotia e le RNZ Pacific, tulaga tau i le mafaufau e faaali ai sootaga aemaise lava i totonu o aiga ma mafutaga ma uo ma totonu foi o aoga, e fesoasoani ai e foia le aafia o tagata talavou o le Pasefika mai le depression.
O Dr El Shadan Tautolo mai le AUT na ia faailoa i le lipoti lea o le suesuega ua iloa ai o tulaga mafatia ia i le Pasefika e masani ona o faatasi ma mafutaga e le o lelei mai totonu o aiga aemaise foi i faigauo i aoga.
Fai mai Tautolo e pei ona lipotia sa silasila totoa le suesuega i le tulaga o mafutaga ma auga o le depression i talavou Pasefika mai le 17 tausaga ma o i ua iloa ai nisi o mafuaaga tāua ma o ni mea e ao ona sauni ma tapena iai mo le faia o ni galuega fesoasoani iai.
O le iuga o lenei suesuega tāua ua faailoa faatasi mai i le vaiaso lenei o loo faailoa ai le Mental Health Awareness week i le atunuu.
