O le asō na fofoga ai loa le lalolagi i le auiliiliga o faamatalaga o le maliega ua sainia nei ma faamauina a atunuu e tolu e aofia ai Amerika, Ausetalia ma le UK poo le United Kingdom e pei ona folasia ai i San Diego i Amerika ma faasalalau tuusa’o ai e le tele o ofisa faasalalau le maliega a le AUKUS e faatatau i itu tau le puipuiga ma vaamaulu faaniukilia ua amata faagaioia nei.
O le Peresetene o Amerika o Joe Biden, Palemia o Ausetalia o Anthony Albanese a le Palemia o le United Kingdom o Rishi Sunak, ua o latou faalauiloa lenei maliega ma itu lelei mo o latou atunuu ae silisili ai le galulue faatasi mo le puipuia o o latou tagata ma talitonuga o loo auaufaatasi iai.
Fai mai e $368 piliona o le a faaalu e Ausetalia i le oo atu lea i le 2055 e ala i le fausia ai o vaamaulu fou ue 8 i Adelaide ma o le a maua ai le anoanoai o galuega mo ona tagata.
