O se togafa’i e tulata i le malaevaalele i Fagalii, o le pou o fesootaiga a le Digicel, ma le maamaa o le malaevaalele e salu ese, o manaoga ia o le Samoa Airways o loo faatino iai galuega a le pulega o malaevaalele, ona mafai lea ona taunuu ma o ese vaalele Twin Otter o le kamupani vaalele mo malaga e afea ai le malaevaalele i Fagalii, lea ua silia i le lua vaiaso talu ona toe tatala ae e lei faaaogaina.
Ua faailoa e le Minisita o loo iai le vaaia o le Samoa Airways o le toe faaaogaina o Fagalii o le a siiitia ai le tau o le auaunaga a le kamupani vaalele a le atunuu, auā o le taimi nei ua umia e le Malo le malaevaalele o sana meatotino, e le pei o tausaga ua tuanai sa umia e le Samoa Airways le malaevaalele o sana aseta poo se meatotino.
Le Minisita o le Samoa Airways tofa Leatinuu Wayne Sooialo i le polokalame o le Soalepule.
