Afai ae faamamalu le faaitiitia o le saoasaoa faatulagaina e malaga ai taavale i luga o alatetele, e le taumate o le a faaopoopo ai le umi o le taimi e faimalaga ai, mo se faataitaiga e talitonu aveloli e oo atu i le 20 minute le isi umi faaopopo o a latou faigamalaga i luga o auala aemaise lava mo se malaga mai i Aukilani agai i Ueligitone.
O le faalauiloa mai o suiga i le saoasaoa i luga o auala lea o loo faatalitalia le taimi e amata aloaia ai ua faailoa e le Waka Kotahi i le faatalanoaga ma le Herald, o le a faaopoopo ai le isi 28 minute o faigamalaga ma ua gugulu ai nisi ma faailoa finagalo i le vaiaso nei.
Sa matele ina lagolagoina e asosi o le au fai loli ma taavale le fuafuaga a le malo e faaitiitia le saoasaoa faatulagaina ona o le manatu i le saogalemu mo tagata lautele petai la o lea ua faailoa mai e se sooupu a le National o Simeon Brown ua agai le malo i le auala faigofie ae le silasila i le mau mataupu tau le saogalemu i luga o alatetele o loo aliae mai i le taimi nei.
O se tasi o nei mataupu o le faaleleia lea o le auala ae le o le faatuai o faigamalaga.
