Fai mai se lipoti ua le mafai e le vaega o le puipuiga a Niu Sila ona faatino nisi o a latou gaioiga latou te manatu e sili ona faatino e tali atu ai i le manaomia o fesoasoani i le taimi o le afā o Gabrielle ona o le faaitiitia o le aofai o le aufaigaluega.

Faailoa i lipoti a le televise tasi i le asō le tulaga na iai le auaunaga lea ina ua talosagaina e le malo i fesoasoani i le taimi o lea faalavelave faalenatura. 

Ua ta’ua foi na faamalosia ai lava le totogiina o nisi o le aufaigaluega i le oo atu i le tai $10,000 ina ia faatumauina ai i latou ia latou galuega ia aua ai ne’i tapunia nisi vaega o le auaunaga i le navy, ea fosi ma le army.

Ua ta’ua ua lē lava le aofai o le aufaigaluega e faagaioia vaega uma e tolu o le navy ma ua faamalolo foi le auaunaga a le vaalele ea fosi o le Orion ona o le faaititiia lava o le aufaigaluega ua uma ona tolenia mo ia auaunaga.

Na saunoa ai le faauluuluga o le vaega o le puipuiga Kevin Marshall o isi auaunaga o loo matuai manaomia i le taimi nei e aofia ai palama, faimoli, kamuta, special forces ma middle managers ma e faamoemoe o peimeni poo totogi e pei ona ta’ua lea ua oo i le tai $10 afe o le a fesoasoani i le faatumauina o isi i le auaunaga aua e ono oo atu i le tai 4 tausaga e a’oa’o ai pe train ni tagata fou i tomai e suitulaga ai i galuega autu ia ma le faatinoga.