Ua molimauina i lipoti e lua mai le matagaluega o le soifua maloloina le faaauau pea ona maualalo i le 20 ma ona tupu gasegase fou o le koviti 19, a’o fautuaina ai lava lo tatou atunuu e faatāua puipuiga o le faama’i i le faia o puni fofoga, fufulu mama lima, tausisia le nonofo ma le tutu vava e 2 mita, ma ia faia tuipuipui mo ē e lei faia lava, ma i latou e lei faia le tui lona lua ma le tui lona tolu.
Na aumai le lipoti o le lua aso na amata i le aso 11 i le aso 13 o Iulai e 21 gasegase na faamauina ai, ae sau le lipoti o le lua aso na amata i le aso 13 seia oo i le Aso Faraile na te’a nei 15 o Iulai e 23 gasegase fou. Ua siitia ai nei le aofaiga o i latou ua aafia i le siama o le koviti 19 i le 15,178.
E to’alua gasegase o loo taofia i nofoaga faapitoa i le maota gasegase i Motootua ona o āuga o le faama’i. O loo tumau pea le numera o e ua maliliu i Samoa i le faama’i e 29.
