Ua tuuitiitia faigamalaga a pasi i Dunedin ma Queenstown ona o le utiuti o avepasi.
O le faai’uga lea a le Otago Regional Council ma i molimau a le sui o le pulega e lē o lava avepasi e faaauauina faigamalaga a pasi i le aso atoa.
Ta’ua e le sui o le pulega e lē o faigofie le aafiaga o iai nei auaunaga ona o le to’atele ua maua i le Koviti poo le fūlū o loo sau ma le tau mālūlū.
I Queentown o suiga ua iai le faatulagana ma le toe fesuia’iga o taimi o pasi e amata aloaia mai le Aso Lua o le vaiaso a sau ma e faaauau ai mo le 7 aso sosoo o le vaiaso.
Ae i Dunedin e na o aso o le vaiaso o loo aafia ae tumau pea taimi o faigamalaga i le faai’uga o le vaiaso.
Ta’ua mai ai le faigata ona taumafai e faasoa faigamalaga ma le aufaigaluega ma sa taumafai malosi lava le council ia aua ne’i telē le aafiaga mo fanau aoga.
O le aso e amata faasalalau ai e le Council taimi ma suiga o nei faigamalaga i luga o lana upega tafailagi.
