Ua moumou malie atu lena tausaga 2022 ma luitau tetele sa feagai ma le Malo i ana galuega faatino mo le toe faaleleia o le tamaoaiga e mafua i aafiaga o le faamai Koviti-19.
Peitai o ia luitau e lei taofia ai le tiute tauave o le Malo i le faasafua ma faasoa atu fesoasoani i soo se vaega o auaunaga tumaoti i le itu tau pisinisi, ae sa le taofia ai le togitogi pea o ana aitalafu i faletupe faavaomalo sa nonō pe aitalafu mai ai seleni mo nisi o fuafuaga fai tau i le tamaoaiga.
Mai ia aitalafu e faitau miliona toetoe pā’ia le piliona tālā sa iai, ua faailoa nei i faamaumauga a le Ofisa o numera faamaumauina poo le Samoa Statistics Bureau mo le masina faaiu o le tausaga na tea nei, o le 910 tesimale 6 miliona o aitalafu sa faamauina i le kuata lona tolu o le tausaga 2022 na mae’a ia Setema o lena tausaga, o lea ua palasi nei i lalo ia aitalafu i le aofaiga e 96 tesimale 3 miliona tala poo le 9 tesimale 6 pasene.
Ua aofia i nonogatupe na faamauina i le tausaga e 2020 i le 2021 aitalafu poo external loans e 909 miliona tala na faia e le Malo, ma ua totoe nei le tasi tesimale 3 miliona tala o loo tau faamae’a ona totogi.
O nonogatupe na faia i luga o maliega poo multilateral agreement loans sa faamauina i le 481 miliona tesimale tasi miliona tala ua faaitiitia nei i le 27 tesimale 7 miliona poo le 5 tesimale 5 pasene, e faatusa lea i faamaumauga i le masina o Setema o le tausaga 2021.
O le tele o nonogatupe na faia i luga o maliega sa maua mai lea i le faletupe o le lalolagi ma le faletupe o atiina a’e o Asia lea ua faailoa i faamaumauga lata mai ua faaitiitia nei i le 10 tesimale tasi miliona tala.
