O se taeao sa lupe ma o le faamoemoe a le Autalavou mo Keriso poo le Youth for Christ (Y.F.C.) e patipatia ai le atoaga o lona 50 tausaga talu ona faavaeina i Samoa nei.
O le faamanatuina ai o le Iupeli Auro a le Y.F.C. i le taeao nei na faia ai se savali faaaloalo ma se sauniga e aloaia ai lenei faamoemoe.
Na saunoa le Sui Palemia Afioga Tuala Tevaga Iosefo Ponifasio o se faamoemoe e lei faigofie ona ausia i le tele o faafitauli ma le gasologa o le olaga aemaise lava i le auaunaga a lenei faalapotopotoga e patino lea i tupulaga talavou.
“Ia, ua umi le faafeiloai i lenei taeao, ae e iai le manatu, ia sala i le umi auā ou te talitonu, e lē o se matatia ausiagofie le 50 tausaga, ma ou te manatu foi, e lē o se malaga sa solo lelei i aso uma.
“Sa tele luitau na feagai ai, ae o le alofa o le Atua ua mafai ai ona tatou feiloai i lenei taeao matagofie i luma o nuu, ae lē o tua o nuu.
“Malo le folau i le Aiga YFC ua malaga mai ma ē o loo alala ma papaaao i Samoa nei – i latou o loo galulue ma sa galulue auā fuafuaga ma tapenaga a le Autalavou mo Keriso i Samoa.”
O Fepuari o le tausaga 1973 o le tausaga lea na faavaeina ai lenei faalapotopotoga.
“E lē o se lotu poo se tapuaiga a o se faalapotopotoga e unaia le ola faaleagaga ma le ola faakerisianoina o tupulaga o Samoa.”
O lenei faalapotopotoga e galulue faatasi lea ma isi Ekalesia o i totonu o le atunuu e tapue soifua ma ola faaleagaga a fanau auā o le lumanai lea o le aiga i aso o i luma.
“O le uluai faavae ai lea o se faalapotopotoga mo Samoa aoao, e ‘auga i tupulaga talavou, e ese mai mafutaga faaautalavou i totonu o lotu taitasi ma le saofaiga a afioaga ma alalafaga e ala i aumaga ma aualuma.
“O le mafai e le YFC ona galue e aumai faatasi lotu Kerisiano eseese o se itu na tulaga ese ai lona faavae mai.
“E talitonu le manatu o le amataga poo le laa muamua o soo se faamoemoe, e matuā faigata.
“E tatau ai ona ave le faamua i ē na mua mai, o i latou ia na asaina le gasū o le taeao!
“E faapea foi i le galuega i le faavaeina o le Autalavou mo Keriso ma e faafetai ai le alofa ma le faasoa a le Atua i nisi o ona taitai auā le taitaiga ma le amataga o lenei galuega.”
O le susuga ia Tavale Mataia o le faafeagaiga taulagi ma lona faletua o i laua ia sa faavaeina mai le Y.F.C. lea na talatala e le Sui Palemia e tusa ai o le amatalia maia o lenei faamoemoe.
“O le faatausiusiuga o le 1972, na to’ai atu ai le savali a ni tamaalii o le talalelei – Le Susuga
ia Ene Sagala, Max Rasmussen ma le Susuga ia Rev. Jerry Appleby, i le Susuga ia
Tavale Matai’a auā le taitaiga o lenei galuega tāua.
“Mulimuli ane na faaopoopo iai ma le lagolago a nisi foi tamaalii, e pei o le Susuga ia Andy Forsgren ma o latou faletua.
“Na vaaia le uluola o le galuega i le taitaiga a le Susuga ia Tavale ma lona Faletua ia Alison atoa ai ma le lagolago a le auvaa o le aufaigaluega a le YFC.”
Na ta’ua e Tuala le tele o galuega faatino sa faia lea e lenei faalapotopotoga auā le fafagaina o le ola faaleagaga o le tama ma le teine talavou.
E pei o le faatinoina o taumafaiga eseese e aofia ai polokalame faasolo i totonu o aoga, o togalauapiga ma mafutaga, o talai’ga sa faatino i nofoaga faitele, atoa ai ma aoga Tusi Paia sa faatino i nuu ma afioaga.
Na faaauau le tuputupu a’e o le galuega ina ua see le taitaiga o le Autalavou mo Keriso i le Susuga ia Viliamu Mafoe mai le 1986 seia oo i le tausaga 1997, ina ua faavaeina le Ekalesia Worship Centre i Samoa ma atunuu mamao.
“O le aso lenei, e lē o se aso e tolaulau ai ni lelei o le tagata – ae o le aso e ave ma faatumau le viiga o le Atua auā o la tatou savaliga e fai ma le faatuatua i le Atua o loo tatou auauna i ai, e faataunuu ana fuafuaga i lona finagalo Silisiliese, ae a iai so tatou sao.
“Ou te manatu, e lei taunuu le tatou malaga – e faaauau pea, auā o loo tulai mai pea luitau fou o loo aafia ai ola o a tatou fanau – ua vaaia le televave o tuinanau o le social media, ua oo mai i le tatou atunuu fualaau oona ma fualaau faasāina, le sauaina o tina ma fanau ma vevesiga i totonu o aiga taitasi ua faatuputupulaia.
“Y.F.C. aua le fiu, aua le solomuli pe faavaivai ae ia taula pea i le Papa e lē faagaeetia o lo tatou faatuatuaga faa-Kerisiano o le faavae foi o lo tatou malo tutoatasi.
“Ia outou faaauau pea le tapueina o agaga ina ia avea pea Autalavou mo Keriso o se autau a Keriso i Samoa ma atunuu i fafo e tineia le fili ma le tiapolo.”
O le Aso Lulu o le vaiaso nei lea o loo fuafua e faamae’aina ai lenei faamoemoe.
