O le tāua o le sao o ekalesia Kerisiano ma isi tapuaiga i totonu o le atunuu i le faafailele ma tapue le ola faaleagaga o o tatou tagata, ua ogatasi ma le autu o le Faavae o le Malo tutoatasi o Samoa.
O le aotelega atoa lea o le saunoaga a le Minisita o Alamanuia Pisinisi ma Leipa o loo tauaveina tiute o le Palemia i le faamanatuina o le 60 tausaga talu ona taunuu i Samoa le Ekalesia Nasareta.
I totonu o le 60 tausaga ua aulia e sefulufa aulotu ua faatuina lea e fā aulotu i Savaii, ae 10 i Upolu. Ua iai foi ma le Kolisi Faafaifeau a le Ekalesia Nasareta na faavaeina i le tausaga e 1974.
O le tausaga e 1962 na taunuu ai le ekalesia ma faatuina ai le uluai aulotu i Matautu Lefaga i le tausaga lava lea.
Se vaega o le saunoaga a le afioga i le Sui Palemia le tofa Leatinuu Wayne Sooialo i le faailogaina o le atoaga o le 60 tausaga o le Ekalesia Nasareta i Samoa.
