E tolu vaega tāua o le a ave iai le faamuamua a le Komesina Fou o Leoleo susuga Auapaau Logoitino Filipo ina ia mafai ona mauaa le auaunaga a le Matagaluega e ala lea i le puipuiga o le atunuu.
I ripoti a le Samoa Global News na ta’ua ai e Auapaau o le a tagatagai e galulue vavalalata ma sui o afioaga alii ma fiapule, faapea foi ona faatu se laulau a fono (board) e feagai ma suesuega e taimua e leoleo ma faatino galuega i se auala e mafai ai ona vave tali atu leoleo i soo se valaau mai le atunuu.
E pei ona silafia o le vaiaso na tea nei na aloaia ai le filifiliga o Auapaau e avea ma Komesina o Leoleo talu mai le 10 masina na avanoa ai le nofoa ina ua faamavae lē sa tulai mai i le tofi le afioga Fuiavailiili Egon Keil.
Ua 24 tausaga talu ona tautua Auapaau i le Matagaluega ma ua lava tapena foi e tulai mai i le tofi e faauluulu iai le Matagaluega o Leoleo a le atunuu.
