Ua iai nei le filifiliga e suia le kapeteni o le pulega o le Lakapi Samoa i le tofiga Ofisa Sili ma ua tula’i mai ai le Tofa Seumanu Douglas Ngau Chun, ma ua sui tulaga i le Susuga Faleomavaega Vincent Fepuleai sa tauaveina lea tofiga mo le umi e iva tausaga.
Photo: Lakapi Samoa
E filifilia Seumanu e na te tauave le tofiga Ofisa Sili o le pulega o le Lakapi Samoa o loo galue o le pule poo le General Manager o le tasi o vaega tāua o le atina’e o le taaloga lakapi o le High Performance Unit o loo i Tuanaimato, lea o loo iai foi ma le ofisa autū o le Lakapi Samoa.
O se auaunaga na ia amata tauave mai le tausaga e 2020, peitai ua faailoa e le Lakapi Samoa o se tamalii ua 15 tausaga o lotolotoi ma galue i le atina’eina o le taaloga lakapi i lo tatou atunuu.
O agavaa ma tomai ma le poto masani o Seumanu i lana tautua i le taaloga ua faailoa ai e le ta’ita’ifono o le Komiti Faafoe o le Lakapi Samoa susuga Tuilaepa L Sailele Malielegaoi i se pepa o faamatalaga, o Seumanu Douglas Ngau Chun o se tasi ua faatuatuaina e lē gata o ia o le ta’ita’ifono ae o le to’atele o i latou o loo galulue i totonu o le pulega o le lakapi i Samoa.
Ua molimoli ai foi le faafetai a le Ofisa Sili ua filifilia i le ta’ita’ifono ma le Komiti Faafoe i le tuuina atu o le faatuatuaga na te tauave ai le tofiga, auā le atina’e manuia o le taaloga mo alo ma fanau a le atunuu.
