O le vaiaso nei ua maua ai se faamatalaga mai le ta’ita’ifono o le Review Panel poo i latou sa iloiloina le mataupu e faatatau i le asosi o le autaaalo lakapi ma le NZ Rugby.

Ua fautuaina ai e le ta’ita’ifono le faia o ni fetuuna’iga i le puleaina o le taaloga i le atunuu ma ta’ua ai o se faamata’u mai le asosi o le autaaalo lakapi e faapea o le a savavali ese mai le NZ Rugby e lē o se tulaga e fesoasoani i le taaloga.

O le Aso Tofi o le vaiaso nei ua ta’ua i le lipoti a le RNZ o le a faataunuu ai le fonotaga faapitoa faaletausaga a le NZ Rugby e palota ai i manatu e lua ua faatulaga mo lenei mataupu.

O le Proposal muamua ua fautuaina ai le faaaogā mai o le iuga o le Pilkington Report mai le tausaga na te’a nei ina ia pulea le lakapi e se fono faatonu e filifilia saoloto ma tatau ona toaiva sui auai.

O le isi manatu sa tuuina ane mai nisi o iuni faaitumalo e aofia ai Canterbury, Ueligitone ma Aukilani, ina ia tatau i ni faatonu se toatolu i totonu o le fono faatonu lea ona faatino se auaunaga i fono faatonu a iuni faaitumalo i le taimi ua sola ina ia agavaa ai e avea ma sui o le Board.

E lagolago la e le asosi a le autaaalo Rugby Players Association le fuafuaga muamua ma ua lipotia ua faamata’u ane foi o le o latou faatūina se isi toino fou e puleaina le taaloga faapolofesa pe afai e taliaina le manatu mai iuni faaitumalo.

O le vaega sa silasila iai le Review Panel poo i latou sa iloiloina le mataupu o le saunia lea o se totino e puleaina (governance body) atoa le taaloga, faalelei le taaloga mai lava i polokalame amata i komiuniti seia oo i le tulaga faapolofesa.

Puna o Faamatalaga: https://www.rnz.co.nz/news/top/518021/rugby-players-threat-to-walk-not-helpful-review-panel-chair