Ua lipotia nisi o popolega o puleaoga i Aukilani i le faatupulaia pea o tamaiti aoga ua vave ona faamaamulu ma aoga ma na amata mai lava le tulaga lea i le tausaga  talu ai.

Fai mai le Televise Tasi o le faamatalaga mai puleaoga ua maitauina lava le toatele o fanau aoga ua agai i galuega e laiti totogi.

O le puleaoga o le Kolisi o Otahuhu, Neil Watson na ia ta’ua ua ia maitauina le siitia o le aofai o tamaiti aoga ua agai ese ma le aoga ae  lei mae’a aemaise lava i latou i le Tausaga 13.

Fai mai Watson pe ā ma le 30 tamaiti ua agai ese mai le latou aoga i le tausaga lenei, tamaiti o le Tausaga 13 ma fai mai le alii pule e moni o le toatele o i latou ia ua agai ese ona o galuega ae o le popolega tonu lava lea ona o lo latou lumanai aemaise pe afai e le ausia le suega e ulufale ai i iunivesite.

Ua faamatala foi e le puleaoga mai Papatoetoe o Vaughan Couillault ua toatele talavou ua faigaluega i le faaiuga o vaiaso ma ua maua foi fulltime a isi ma agai ese ai loa ma le aoga ma ua atili ai ona faaitiitia le aofai o tamaiti matutua i le aoga.

Fai mai le puleaoga o le James Cook High, Grant McMillan o le toatele o tamaiti aoga ua agai i galuega e fesoasoani ai i o latou aiga.