Ua faailoa i lipoti a le NZ Herald i le aso ananafi le suafa o lē na pueina e leoleo i New Windsor i le masina talu ai ona o loo feta’ua’ina sa taumafai e ave faamalosi se tagata.
O ia lea o Daneous Sosaiete o loo feagai nei ma moliaga e 15 pei ona lipotia i le Herald, e aofia ai ma moliaga o le taufaamatau e fasioti se tagata, lua moliaga o le avetaavale matautia ua mafua ai manuaga.
O loo molia foi lea alii 20 tausaga i le gaoi. O le vaiaso talu ai sa talosaga ai lana loia Devon Kemp mo le taofia o le faailoaina o lona igoa peitai na teena e le faamasino.
Ua ta’ua mai la i le aso ananafi o le a taofia pea i le vaaiga a leoleo seia aulia Fepuari o le tausaga fou.
