Ua faailoa le polokalame o le malaga mai o le aulakapi liki o le Toa Samoa auā le tali faaaloalo a le Malo ma lo tatou atunuu e mafua i le tulaga maualuga na oo iai le finau a le Toa Samoa i le Ipu o le lalolagi, ina ua ausia le sailiga o le siamupini o le Ipu autu.
O le Aso Lua e taunuu ai le vaega muamua o le ‘au i le 11 i le po, ma le Aso Lulu e taunuu ai le vaega loa lua, ona amata ai lea o le polokalame i le Aso Tofi o le vaiaso nei o le a faia ai le solo i le taulaga i Apia, i le 10 i le taeao pe a mae’a le sauniga lotu faalemalo.
O le feiloaiga ma tusitala e sosoo ai i le 12 i le aoauli, ae o le taumafataga o le afiafi poo le sponsorship dinner e taualuga iai le aso muamua e faia i le faletalimalo Return to Paradise Resort i Lefaga.
O le Aso Faraile o le asia e le Toa Samoa le Ao o le Malo ma lana Masiofo, faapea le afioga i le Tama aiga le afioga Tuiatua Tupua Tamasese Efi i lona maota i Tuaefu.
E faapea foi ona asia le nofoaga o le aumatutua i Mapuifagalele ma le nofoaga o tamaitai Sa Monike i Vailima, ae taualuga i le taumafataga afiafi e faia i le faletalimalo o le Taumeasina Island resort i le 6 i le afiafi.
O le Aso Toonai o le a malaga ai i Savaii, ae e lei faamautuina mai le polokalame mo le asia ai o le motu tele i Salafai. O le Aso Sa o le a asiasi ai tama o le Toa Samoa i o latou aiga ma mafuta ai seia oo i le Aso Gafua o le a faaauau ai lea tulaga ma toe malaga ese ai ma Samoa, mo Niu Sila, Ausetalia, ma Peretania o loo faamautu ai tama o le Toa Samoa.
E iai le talitonuga e faato’a iloa se meaalofa tupe o le a tuuina atu e le malo i le au lakapi liki a le atunuu ma le puega, i sauniga ua faatulaga mai i le Aso Tofi ma le Aso Faraile.
