Ua faailoa faalaua’itele ai nei le afea o Samoa e se ‘aunetipolo a tamaitai Ausetalia i le faamoemoe e faia ni ana taaloga i le atunuu ma le ‘aunetipolo a tamaitai Samoa.
O le ‘aunetipolo a Ausetalia le Diamond Donnell Wallam o le a taunuu i le Aso Lua o le vaiaso fou ma faagasolo ai ni ana polokalame o loo galulue faatasi ai le asosi netipolo a Samoa ma le asosi netipolo a Ausetalia.
O se tasi o ia polokalame o le faia lea o ni faalauiloa e una’ia ai alo tamaitai o le atunuu e faaaogā taaloga e maua ai le malosi ma le soifua mālōlōina.
E tolu aso o le a iai i le atunuu lea ‘aunetipolo, ma ua faailoa e le Pelesetene o le asosi o lea taaloga i Ausetalia o se fiafiaga tele i le ‘au a le Wallam le sauni malaga mai e mafuta ma fetufaa’i ma tamaitai o le atunuu o loo lotolotoi i le atina’eina o le taaloga i Samoa.
Ua faailoa i se faasalalauga le nofo sauni o le Pelesetene ma le asosi netipolo a le atunuu e faafeiloa’i le ‘aumalaga o le aunetipolo a Ausetalia.
