O le masina amata lenei o le tausaga fou 2023, ua atoa iai le iva masina o faagasolo le polokalame o le tafiesea o sauaga faasaga i tina ma fanau teine laiti, sa faatino e le faalapotopotoga o le Toomaga mo ē Puapuagatia, ae faatupe i le fesoasoani a le Malo e lima selau afe tala.
O lea ua faailoa e le Toomaga o le aso 23 o le masina nei e faia ai se sauniga e tapunia ai lea polokalame, sa faagasolo i totonu o nuu ma afioaga e fitu, 6 kolisi maualuluga, 5 faalapotopotoga o taulelea, 15 faalapotopotoga o tupulaga talavou, toa 100 sui o le polokalame o le nofotane o loo faia a latou atina’e e maua ai lava a latou seleni mo le faatinoina o fuafuaga o le tamaoaiga i o latou aiga.
Ua faailoa foi e le Toomaga i se pepa o faamatalaga, e 136 tagata ua faasaoina mai sauaga e aofia ai fanau o loo i le vaaiga a le faalapotopotoga sa oo iai le polokalame, faapea le 45 o fanau o loo faatau savali oloa i le taulaga poo child vendors.
O Aperila o le tausaga na tea nei na amata ai le polokalame e tetee ai le sauaina o tina ma fanau teine, ma ua faailoa e le Peresetene o le Toomaga le faletua o Siliniu Lina Chang, ua latou molimauina le iai o le aogā o le polokalame ua luitauina ai tama tane talavou, faapea taulelea matutua e faatino auala uma e taofia ai sauaga.
O le tapunia o le taumafaiga lenei o le a auai tupulaga talavou ma faalapotopotoga faapea nuu ma ekalesia na auai, e patipatia le faaiuina ma le manuia o le faamoemoe ma le manulauti tāua ua ausia, o le taofia lea o sauaga.
