O le vaega mo gasegase tigaina ma faatau iai gasegase manaomia vave le fesoasoani, le emergency department a le falemai i Middlemore lea o loo lipotia i le stuff.co.nz i le asō ua faaigoa mai i se lipoti ua aliae i le asō, o se nofoaga e le saogalemu mo gasegase ma tagata faigaluega.
Fai mai le stuff o se suesuega tutoatasi sa faia i le maliu o se gasegase i le masina o Iuni ina ua agai ese mai i le emergency i Middlemore ina ua faailoa ane iai e faitau itula faatoa oo le faasologa iai, ua tuuina atu ai ma se iloiloga le lelei mo le vaega lea o le falemai.
E lima itulau o le iuga o lea suesuega lea ua faailoa i le asō e aofia ai faamatalaga pei ona ta’ua, ua faamatala ai le emergency department o se nofoaga tumu ma lē saogalemu.
O se tasi vaega o loo aofia mai ai i le iuga o le lipoti e faapea sei vagana le galuega mamafa o loo feagai ma le aufaigaluega, pau lea o le tulaga o loo taofia mai ai le tulai o nisi tulaga e ogaoga atu.
O loo iai fautuaga o loo tuuina faatasi mai ma le iuga o lenei suesuega ma valaau ai mo le toe iloiloina ma faaleleia o le auaunaga i lea foi vaega o le maota gasegase.
