I le 35 tausaga talu ona iai le ofisa o le Malo tele o Amerika i lo tatou atunuu, o le sui poo le Amepasa o lea Malo e faamautu i Niu Sila e vaaia mataupu uma i le va ma le Malo o Samoa.
Ua 15 tausaga o taatia le talosaga a le Malo o Samoa mo se sui o lea malo e nofo ma faamautu i le atunuu ae o lea ua tali le Malo o Amerika, i le iai lea o lona Amepasa mo Samoa e faamautu i lo tatou atunuu.
O le malaga mai o le Amepasa o Amerika le susuga Thomas Undall e faatino nisi o ona tiute na ia faailoa ai ma lea tulaga i le sauniga na faamanatu ai le tutoatasi o Amerika i Samoa.
O se tulaga lelei tele lea fuafuaga ona o le a tagofia uma ai mataupu tau femalagaa’iga a lea Malo i Apia ma isi mataupu faavaomalo e aunoa ma le toe faatali i le ofisa o loo i Niu Sila.
O le a faaopoopo le iai o le Amepasa o Amerika mo Samoa e nofo foi i Samoa, i sui o Malo e pei o Saina, Iapani, Niu Sila, Ausetalia, ma Peretania, ua faamautu i lo tatou atunuu.
A mae’a tausaga ua tuu taimi e galulue ai i ofisa o ia Malo i Samoa ona toe foi lea ae sui mai isi e faaauau tofiga Amepasa, Konesula, ma Hai-Komesina.
O le saunoaga faamanuia a le taitai o le Malo le tamaitai Palemia afioga Fiame Naomi Mataafa, i le faailogaina o le 247 tausaga o le tutoatasi o Amerika, na ia momoli ai le faafetai i le fesoasoani mai pea i le atina’e o le atunuu i le 52 ai lenei o tausaga talu ona faamauina faiga paaga faavaomalo a atunuu e lua.
