E $15,000 tala le aofaiga atoa o le fesoasoani a le Kamupani a le Betham Brothers Enterprises (BBE) o le a tuuina atu pea i le Falemai Fatuga’o a Samoa poo le National Kidney Foundation (NKF).
Mo le faamanatuina o le 30 tausaga talu ona tatala faitotoa o lea kamupani i Samoa e $3000 le foai sa tuuina atu i le NKF i le vaiaso nei ma ua faailoa e le sui sooupu o le Kamupani i se pepa o faamatalaga e amata atu i le tausaga fou mai le masina o Ianuari e oo atu ia Tesema o le a foai e le BBE le tai $1000 i masina taitasi. E tusa la ma le $12,000, a tuufaatasi iai ma le $3000 na taulimaina nei ona maua lea o le aotelega atoa e $15,000 tala.
Ua leva ona taulamua le BBE i lana faamuamua i le ola soifua maloloina ma o se tasi lea o auala e faailoa ai lo latou lagolago mo i latou o loo feagai ma lea gasegase.
Na talia aloaia e le NKF le fesoasoani ma o latou ta’ua o le a fesoasoani tele lea i meafaigaluega ma vaega uma e manaomia e i latou o loo togafitia i le falemai o Fatuga’o i le atunuu.
