Ua faailoa le ‘au ta’ito’afitu a Niu Sila mo le vae o le taamilosaga ta’ito’afitu faavaomalo i LA Amerika ma o le a atoa ai ma le 50 taamilosaga mo le alii o Kurt Baker lea ua aofia ai foi i le ‘au.
O isi ua mafai ona ausia lea tulaga i le ta’ito’afitu a Niu Sila e aofia ai DJ Forbes, Tim Mikkelson, Lote Raikabula, Tomasi Cama, Scott Curry ma Sam Dickson.
O le isi ua aofia ai i le ‘au ua faalauiloa o Lewis Ormond lea ua toe aofia i le ‘au mo le uluai taimi talu mai le lima tausaga talu ai. Ua faailoa e le o avanoa Mikkelson, Curry, Rhodes Featherston, Kitina Vai ma Andrew Knewstubb ona o manu’aga.
Fai mai le faia’oga Clark Laidlaw ua fiafia i le taumafaiiga a lana ‘au e toe taulai ma toe faatulaga talu ona mae’a mai le latou manumalo i le pine apamemea i taaloga o le commonwealth talu ai nei.
O le ‘au la e aofia ai Kurt Baker, Leroy Carter, Che Clark, Moses Leo, Sione Molia o le isi lea kapeteni, Tone Ng Shiu, Amanaki Nicole, Lewis Ormond, Akuila Rokolisoa, Roderick Solo, Caleb Tangitau, Regan Ware, Joe Webber o le isi kapeteni ma Sam Dickson.O le vae lea o le taamilosaga i Los Angeles e faia i le aso 27-28 o le masina nei. O le pulu B o loo faatulaga ai Niu Sila, Aferika i Saute, Amerika ma Kanata ae o Samoa o loo i le Pulu D faatasi ai ma Enelagi, Sikotilani ma Kenya.
