Ua tapena le auaunaga a leoleo i tiute masani o aso fiafia o le Kerisimasi ma le Tausaga Fou e pei ona masani ai i tausaga ta’itasi, ma o se taimi tāua e mata’alia ai malu o le malo, i le puipuia o le saogalemu o le soifua o tagata ma a latou meatotino.
O le taimi o fiafia e tula’i mai ai faalavelave pe a lē faautauta ma tausia e le atunuu le saogalemu a o alo i mālōlōga o aso fiafia e tagofia ai le ‘ava malosi.
O lea ua faailoa e le komiti e pulea le ‘ava malosi itula e tatala ai fale kalapu e pei ona amata tatala i le 10 i le taeao o le Aso Lua, 24 o Tesema ae tapunia i le 2 i le vaveao o le Aso Lulu 25 o Tesema.
E faapena foi i le Aso Lua 31 o Tesema e tatala i le 10 i le taeao ae tapuni fale kalapu i le 2 o le vaveao o le Aso Lulu aso muamua o Ianuari 2025.
O isi aso e ese mai aso ia e tatala i itula masani.
O le tausaga nei o le a leai ni faaaliga o mea faapāpā poo le fireworks display e faafeiloa’i ai le Tausaga Fou.
Ua faailoa e le Minisita o Tupe le Afioga Lautimuia Afoa Uelese Vaai i se lipoti a le nusipepa o le Samoa Observer, ua taugatā tele e silia i le 400 afe tālā e faaalu ai e le Pulega o Tagata Tafafao.
Ua taatia lea seleni mo nisi fuafuaga tāua e faaaogā iai.
