O le lala o Malo Aufaatasi mo polokalame o le atinae le UNDP, ua fesoasoani i le faalapotopotoga o le aufaipisinisi i totonu o Samoa, e tufa atu i tina faipisinisi o le atunuu tomai e latou te mata’itu lelei ai aafiaga o a latou taumafaiga tau pisinisi i faiga faaalatua ma piopio poo le corruption i le faaperetania.

E le gata i tina ma tamaitai o lotolotoi i ia taumafaiga mo lo latou atinae o le tamaoaiga, ae o tina foi mai le lautele o le atunuu ina ia latou silafia ai faiga faapea o loo aafia ai galuega ma pulega i totonu o nuu ma faalapotopotoga o loo avea ai ma sui auai.

I se pepa o faamatalaga faalauaitele o loo faailoa ai o tina mai afioaga o Salelologa ma Fagamalo i Savaii sa mafuta faatasi i se aoaoga e faapitoa i lea tulaga ona o i latou o loo faalagolago iai nuu ma aiga ia latou pisinisi.

E le gata o Savaii sa faagasolo ai lea aoaoga ae faapea foi i le motu o Upolu. Faaalia e le faalapotopotoga a le aufaipisinisi le Samoa Chamber of Commerce, e ao ona latou taulamua i le tausia o pulega lelei ma tausisia taiala o ia pulega e mafai ai ona sagatonu le faagaioia o pisinisi ae o le itu tāua ia tafiesea faiga piopio ma faaalatua, e alofia ai nisi tulaga le lelei e ono lepeti ai le gasologa o le manuia o taumafaiga tau pisinisi a tina ma tamaitai o Samoa.

I lea mafutaga na faailoa ai e nisi o ofisa sinia mai le komisi o tagata faigaluega a le Malo, tulafono e limataitaia ai taiala o pulega lelei e taofia ai le aafia o tagata i faiga faaalatua ma piopio i le faatinoga o a latou auaunaga, ma o se fetu pupula lea i tina ma tamaitai latou te silafia ai tulafono e taofia ai ia faiga.