Na faamaonia mai e le afioga i le Sui Palemia o Samoa afioga Tuala Tevaga Iosefo Ponifasio i luga o le Radio Samoa o le tausaga nei o le a iai se fuafuaga mo le faamanatuina o le aso faavaomalo e manatua ai i latou na maliliu i le taua poo le ANZAC Day.
E pei ona silafia ua 2 tausaga talu ona toafia faamanatuga masani o lenei aso faavaomalo ona o tulaga i puipuiga mai le Koviti19.
Peitai o le tausaga nei ua faamanino mai e le Sui Palemia o le a iai se tapenaga a le malo e fuafua mo lea aso faapitoa
“E iai le lagona o lenei tausaga, o se tausaga ese lenei e faamanatu ai le 60 tausaga o le tutoatasi o si o tatou malo, ma ua iai le manatu ia te a’u ma nisi foi o uso a Minisita e ao ina tatou faataua ia nisi foi o tatou tuaa sa faapena foi ona masaa le toto ma faapena ona finau i se saolotoga mo Samoa. I le tausaga la lenei i le ANZAC Day o le a faapena ona fai ai se tulaga aloaia e amanaia ai foi nisi sa latou asaina le gasū o le taeao aua le saolotoga ma le filemu ua tatou aeae ai i nei vaitaimi.
O le ANZAC Day e faamanatu lea e le lalolagi atoa i tausaga taitasi i le Aso 25 o Aperila e manatua ai i latou na ofo atu lo latou ola e tau le taua mo le saogalemu.
