O le lipoti a le P.S.C. poo le Komisi e pulea tagata faigaluega a le malo na faavae ai le faai’uga a le Kapeneta i le faaauau ma le faamuta loa o le auaunaga a le tofa Auapaau Logoitino Filipo i le tofi Komesina o le Matāgaluega o Leoleo, Falepuipui ma le Toe Fuata’ina.
O le fono a tusitala ma le Sui Minisita o lea matāgaluega i le faai’uga o le vaiaso ua mavae na tāpā ai e tusitala sona finagalo e faamanino ai le faai’uga na faia e le Kapeneta i lana fonotaga o le Aso Lulu ua mavae.
Na māfua lea ona o ulua’i lipoti na ta’ua ai ua tuli pe terminate le tofiga o le Komesina, ae o loo tālia le filifiliga o se isi Komesina o leoleo ina ua mae’a le konekarate 3 tausaga a le tofa Auapaau Logoitino Filipo i le masina o Iulai o le tausaga nei.
Le afioga Mulipola Anarosa Ale Molioo o le Sui Minisita o le Matāgaluega o Leoleo, Falepuipui ma le Toe Fuata’ina.
O le Aso Faraile ua mavae na faamavae atu ai le matāgaluega i lē sa avea ma Komesina, ae tauave e le Sui Komesina o loo pulea le vaega o falepuipui le susuga Leiataualesa Samuelu Afamasaga le vaaia o le matāgaluega, e pei o le faai’uga a le Kapeneta.
