A o faaaogā ai pea e le kamupani vaalele o le Samoa Airways le malaevaalele i Fagalii mo ana faigamalaga i le va o Samoa ma Amerika Samoa, o le masina faai’u o lenei tausaga o le a faatino ai se suiga mo malaga uma e faia i le Aso Sa taimi lea i Samoa ae o le Aso Toonai i Amerika Samoa.
Ua faailoa e le Samoa Airways i lana upega tafa’ilagi, o le Aso Sa o lumanai nei le aso 7 o Tesema e amata ai ona faaaogā le nofoaga fou ua mae’a fausia ma umusa, le Regional Terminal i le malaevaalele i Faleolo mo malaga i le va o Apia ma Pago Pago, faapea malaga mai Tutuila mo Apia.
E manino mai i lea faaaliga a le kamupani vaalele o le Samoa Airways o le a le faaaogāina le malaevaalele i Fagalii i Aso Sa i malaga i le va o Samoa ma Amerika Samoa, ae o le a faaaogā le nofoaga fou i Faleolo mo ia faigamalaga.
E iai le talitonuga o le a fifilemu ai le pa’ō o afi o vaalele mo le afio’aga o Fagalii ma nuu tuaoi a o faamamalu le sapati poo le Aso Sa.
