O le iai o lapataiga ma fautuaga mo Samoa i uiga louloua o le tau i le taunuu mai i le faaiuga o le vaiaso muamua o lenei tausaga fou 2023, ua taunuu mai ai foi i le polokalame masani o le vaiaso o talosaga ma anapogi e talosia ai le faigamalaga a le atunuu ua amatalia, mo lenei tausaga fou, ae e talosia ai foi i le afea e mala faalenatura e pei o afa fulifao, ma matagi malolosi faapea timuga mamafa e mafua ai tafega ma lologa.
O le saunoaga faamanuia o le tausaga fou a le afioga i le tamaitai Palemia na ia faailoa ai ma le amatalia o le vaiaso o talosaga ma anapogi i le Aso Sa o lumanai nei le aso 8 o Ianuari ma faaauau ai seia maea i le aso 13 o le masina nei lava.
O le fono a ekalesia soofaatasi i le atunuu o loo tapenaina le polokalame faatasi ai ma le lagolago a le Malo.
Mo le silafia o le mae’a o afa tetele o Ofa ma Valelia i le tausaga e 1990 ma le 1991 na amata ai le polokalame o le vaiaso o talosaga ma anapogi, lea ua 32 tausaga o faaauau pea.
