O le faasilasilaga faapitoa i le asō a le afioga i le tamaitai Palemia, Fiame Naomi Mataafa, ma se feiloaiga ma le autusitala, na ia saunoa ai i le faataotoga ua iai nei le fuafuaga a le faigamalo i le faamanatuina o le 60 tausaga o le Tuto’atasi o le Malo i le masina fou.

Ua faai’ugafonoina e le Kapeneta, o le a atoa le tausaga o le samiina ma le faamanatuina o le 60 tausaga talu ona saoloto ma tuto’atasi le faigamalo a Samoa. E afua atu i le aso 1 Iuni 2022 seia oo atu i le aso 31 Me 2023.

O le a faatino le sauniga faalemalo mo le sisiina a’e o le tagavai o le Malo tutoatasi o Samoa i le malae o Tiafau i Mulinuu i le Aso Lulu, aso 1 Iuni, ma e na o se vaega toaitiiti e ala i ni valaaulia o le a auai i Mulinuu, ae o le a tuu atu le avanoa i afioaga ma itumalo, e faatino ai a latou lava faailogaina i lea aso faapitoa.

O le a aloaia lava le aso malolo i lena aso. Ua iai le faamoemoe e amata le polokalame i le tatāina o logo ma faailo sailigi uma i vaega o le atunuu i le vaeluaga o le po o le Aso Lua e faafeiloai ai le aulia e le atunuu o lona 60 tausaga, ona faatino ai lea o sauniga i le taeao o le Aso Lulu, aso 1 Iuni 2022.

Afai e iai ni faafiafiaga o le a tapena i ai afioaga ma alalafaga e faatino i lea aso, o le a taoto atu i le pulega a alii ma faipule, mo le faamanatuina o lea aso i totonu o latou lava laufanua ma lotoifale.

O faafiafiaga uma ma isi polokalame ua fuafua e le Malo e sami ai le tutoatasi, o le a faato’ā faatino i le vaiaso muamua o Setema e vaavaalua ma le faamanatuina o le Teuila.

Sa faatāua mai le saunoaga a le tamaitai Palemia le mafuaaga i tua o lenei suiga, e lē gata ina ia mafai e tagata uma o Samoa ona maua le avanoa e faamanatu ai lenei aso tāua, ae faapea foi i le tausisia pea o faaeteetega mo le pipisi o le faama’i.