O le tulai mai o faaletonu i le Tulafono fou o Fanua ma Suafa o se tasi lea o lu’itau o feagai ma le faigamalo fou, e pei ona afea i se finagalo o le tamaitai Palemia, i le feiloaiga ma tusitala ina ua faalauiloa le sui tauva o le latou vaega faaupufai ua sauni i le palota laititi a Gagaifomauga Numera 2. O le tasi lea o mafuaaga e pei ona silafia na faamavae ai le afioga Fiame Naomi Mataafa ma le tofi Minisita a o avea ma Sui Palemia i le faigamalo a le vaega e puipuia aiātatau a tagata i le paeaiga lona 16 a le Palemene. O le faatulai mai o lea tulafono a o tapena e le faigamalo sa tulai i le pulea o le atunuu o se tasi lea o faiga faavae sa finauina e le tamaitai Palemia a o faia faatosina o le palota tele ma avea ai ma se tasi o folafolaga a le Faatuatua i le Atua Samoa ua Tasi, o le a latou faasolomuli i tua pe a filifilia e avea ma faigamalo.
Le afioga i le Palemia o le taitai o le Faatuatua i le Atua Samoa ua Tasi, afioga Fiame Naomi Mataafa, i le feiloaiga ma le vasega o tusitala ma le aufaasalalau, i le faalauiloaina o lo latou sui tauva mo le palota laititi a Gagaifomauga Numera 2.
