O loo lagolagoina e le ofisa sili o le Iuni a Tagata Faigaluega a le atunuu le finagalo o le Minisita o Galuega Faavaitaimi, o le lē lava o le faalauiloa ma le faamalamalamaina i alo ma fanau o le a malaga atu o vaega tāua e agavaa ai i latou pe a galulue i fafo a o lei malaga ese atu ma le atunuu.
O le faafitauli tele lava o le lē iloa e nai o tatou tagata e tatau ona aveese e le kamupani o loo galulue le 10 pasene mai o latou totogi mo a latou saofaga poo a latou Super e tusa ai ma le tulafono a le malo o Ausetalia.
O le isi faafitauli tele, e eseese le tele o setete o Ausetalia ma e lē tasi foi se kamupani e faatino ai teugatupe ia, ma e tofu lava le kamupani ma ana faiga faavae ma tulafono, e aofia ai nisi kamupani e latou te lē taliaina le aumai o seleni i Samoa.
O isi e latou te lē taliaina faamaoniga o loo tuuina atu e tauala atu i le Matagaluega o Faamasinoga a Samoa, ae o isi foi kamupani ua iu lava ina faatonu mai le tagata e ana le saofaga ina ia pue atu sona ata o loo ia uuina lona tusifolau e faamaonia ai ia tulaga uma.
Ma na faailoa mai e le tamaitai ofisa sili, o itu ia e manatu ai e pei ua faailogalanu Ausetalia i le faagasologa o vaega uma.
Ma o ia vaega uma ua talosagaina ai e le Iuni a Tagata Faigaluega a le atunuu le malo ina ia toe silasila i sa latou fesoasoani e faafaigofie ai ona faamatuu mai e Ausetalia seleni a nai fanau.
Faaalia e Saina Tomi, o le tele ia ma le anoanoai o vaega e moomia ae e lē faigofie foi ona faatino.
O isi tagata ua au tausagā o faatali pea se tali mai a latou saofaga, o isi ua tauau lava ina fati i le umi ona faatali.
Peitai ua aapa atu le Iuni ma fesoasoani, ma unai malosi kamupani i Ausetalia ina ia vave ona totogi Super a nai o tatou tagata.
