Ua faaalia e le Minisita o Tupe ma Galuega Faavaitaimi o Lautimuia Afoa Uelese Vaai le tulai mai pea o le faafitauli o le lē totogia e kamupani o loo faafaigaluegaina tagata Samoa i Galuega Faavaitaimi o Superannuation a o tatou tagata i le mae’a ai o a latou konekarate.

O le “Superannuation” e na o Ausetalia o loo faia ai.

O le Super o se teugatupe a le malo o Ausetalia mo le tagata faigaluega ma e mafai ona tala i tua pe a litaea, e tai tutusa lava ma le NPF.

O lea teugatupe e agavaa ai tagata Samoa o loo galulue i galuega faavaitaimi i Ausetalia, ma e faatoa mafai lava ona tala i tua pe a mae’a konenarate.

Ua iai nisi faaseā ua maua mai tagata Samoa o loo galulue faavaitaimi e oo atu e talosaga a latou “super” ae faatoa iloa ai e leai se mea o totogia.

Na faaalia e Lautimuia, o lea faafitauli e tatau ona lava le faalauiloa ma ia malamalama o tatou tagata.

O le matafaioi a le Komiti ma le Matagaluega o le faamalamalama i tatou tagata a o lei malaga atu mo galuega.

Faaalia e Lautimuia, o le itu ua maitauina e le Matagaluega o tatou tagata e maua loa avanoa pau lava le naunautaiga o le fia oo i atunuu ua maua ai avanoa faigaluega, ae galo ai ia i latou le tele o ni vaega e ao ona latou malamalama ai.

Na ta’ua e le Minisita o se itu o loo lape ai foi le tulaga i le aoaoina ma faamalamalama lelei i nai o tatou tagata tulaga uma e ao ona malamalama iai a o lei malaga atu mo galuega faavaitaimi.

Faailoa mai e Lautimuia e tatau i le Matagaluega ma le Komiti ona tagatagai i ia vaega uma ina ia lava le malamalama o nai o tatou tagata, ae lē gata i lea e tatau foi ona silasila i kamupani taitasi o loo latou faafaigaluegaina o tatou tagata, poo le ā se faiga e foia ai lea faafitauli.

Saunoa Lautimuia o nisi ia o faafitauli e aogā ai lava le galulue faatasi o nai o tatou tagata e lē gata i Samoa nei ae faapea foi i Ausetalia ma i latou o loo vaaia galuega faavaitaimi i atunuu i fafo.