Ua saunoa le Minisita o le Va i Fafo a Niu Sila, Winston Peters o loo lagona faatasi foi e le malo le lē fiafia o tagata Niu Sila o loo poloka i Niu Kaletonia ina ua lē ioeina e Farani le faataunuuina o ana faigamalaga i le asō e faaauau ai le toe faafoi mai o tagatanuu Niu Sila i le atunuu.

O le asō ua lipotia ai le taunuu ane o le Peresetene o Farani, Emmanuel Macron i Niu Kaletonia i se taumafaiga e faamuta vevesi ma tetee o loo tulai mai ai ona o fetuunaiga a le malo o Farani ua faia e faatatau i faigapalota.

E toaono tagata ua maliliu e aofia ai ma ni leoleo se toalua, ua maliliu talu mai vevesi na amata i le vaiaso talu ai.

O le faamatalaga la a Peters na faailoa mai i se pepa o faamatalaga ma ta’ua ai o le faamoemoe o le malo ina ia toe faafoi mai tagata Niu Sila i Niu Kaletonia i se taimi vave ma o loo faaauau pea ona galulue faatasi ai ma Ausetalia.

E to’a 50 foi isi tagata NIiu Sila na taunuu mai i le taeao analeila i Aukilani, na avane e se vaalele faagaioia e le malo o Farani agai i Brisbane ma aumaia ai e le vaalele a le Ea Fosi a Niu Sila i le malaevaalele faavaomalo i Aukilani.

E faafetaia ai foi e Peters Farani ma Ausetalia i le fesoasoani i lea tulaga.

Puna o Faamatalaga: https://www.1news.co.nz/2024/05/23/peters-frustrated-as-french-fail-to-approve-new-caledonia-evacuations