Ua faailoa lautele e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, i auala o fesoota’iga televavave le api o foliga, le faia e leoleo o ni moliaga faasaga ia te ia, ae o le Aso Faraile muamua lenei o Ianuari 2025 o le a aga’i atu ai le Minisita i le ofisa autū o leoleo i Apia e faia ai ia moliaga.
I le saunoaga faalaua’itele a le susuga Laauli i luga o auala o fesoota’iga televavave sa ia faailoa ai o le mataupu i le faalavelave tau taavale na aafia ai le ola o Tuuau Maletino o le mafua’aga lea o moliaga a leoleo na te lē o silafia poo ā ia moliaga.
Le Minisita o Faatoaga ma Faigafaiva susuga Laauli Leuatea Polataivao Fosi Schmidt, i lona faalauiloaina o moliaga a leoleo o le a faia ia te ia.
O le masina o Me o le tausaga nei ua faatulaga e su’esu’e ai moliaga o isi tagata e to’alima e aofia ai le faipule o Salega tasi o loo tuua’ia foi i ni moliaga e fesoota’i i le faalavelave tau taavale na maliu ai Tuuau Maletino.