E oo atu i le 10 tausaga le faasalaga ua faaagaaga mo se isi solitulafono fou ua faalauiloa e le malo e tauala mai i le Palemia Chris Hipkins.
I lana feiloaiga ma tusitala i le aso ananafi na faailoa ai e le Palemia ua faateteleina pea soligatulafono e aofia ai faleoloa, lea e aofia ai ma osofaiga ua faaigoa o ram raids ma le smash and grab.
Na ta’ua e le Palemia ua avea o se popolega tele mo komiuniti lenei tulaga ma ua faamaonia foi o le toatele o i latou o loo aofia i nei soligatulafono o le au laiti e aofia ai tamaiti pe 12, 13 tausaga le matutua.
Saunoa Hipkins e lei manuia taumafaiga i taimi ua tuanai sa faia e tuuitiitia ai lea tulaga ma ua manaomia nisi gaioiga faaopoopo.
Na faamanino e le Palemia o nisi tagata ua fefefe e agai e faigaluega pe nonofo foi i o latou fale ona o nei ituaiga osofaiga.
Na faalauiloa i le vaiaso nei lava e le Palemia ma le minisita o tamaiti, Kelvin Davis se faiga faavae e aofia ai tagata talavou solitulafono ma faailoa ai foi o le a fausia e le malo ni nofoaga se lua mo lea faamoemoe.
O nei la nofoaga ua faamoemoe o le a ofoina atu ai le fesoasoani mo i latou e ogaoga soligatulafono aemaise talavou matutua atu auā e telē le eseesega i le 14 tausaga ma le 17 tausaga ma ituaiga lagolagosua ma taitaiga latou te manaomia.
