Ua faalauiloa nofoaga e aupito i tele iai soligatulafono e faatino e talavou i Kuiniselani a o sauni ai le faigamalo i lea setete e faapasia nisi o suiga e una’ia ai le faia o faasalaga e ogaoga atu mo tupulaga talavou e faamaonia le solia o le tulafono.
O le Premier, David Crisafulli na ia ta’ua e lē o le gaioiga mulimuli lea e faia e fesoasoani ai e faaitiitia le faafitauli lenei i soligatulafono a talavou i le setete.
Fai mai le minisita e feagai ma faamasinoga o talavou, Laura Gerber e amata mai Cairns aga’i i Coolangatta, Brisbane i Biloela ua matua’i feagai komiuniti ma faafitauli i le mataupu lenei ma ua faamatuu ai nei e le faigamalo a le setete nofoaga o loo to’atele ai le au solitulafono.
O le itu i Matu o le setete o loo muamua, lalata atu iai ma le faaitu o Townsville.
O Logan le isi faaitu o loo faamauina foi o loo to’atele ai isi faapea south Brisbane.
O le gaioiga lea a le faigamalo i tulafono le Making Queensland Safer Laws o loo tetee foi iai nisi aemaise i latou e tele le silafia i mataupu tau le tulafono ma le saogalemu o tamaiti.
Fai mai a latou o le a tutumu ai nofoaga o faasalaga ma faatuai ai galuega a le faamasinoga.
Fai mai le vaega faaupufai a le Leipa o tulafono ia e tau faapasia ua faigatā tele ma ua faatatope.
Puna o Faamatalaga: https://www.9news.com.au/national/youth-crime-queensland-hotspots-new-laws/309ca78d-9d2f-457d-ad5a-c2b29bfb3b8e
