Ua faailoa e le Faiaoga a le Manu Samoa le mafuaaga o le faatuai ona malaga mai o Lima Sopoaga i Samoa
A o tapena ai le ‘au a le Manu Samoa mo lana taaloga ma Fiti i le Aso Toonai i le Apia Park, ua faailoa ai e le Faiaoga o Seilala Mapusua le mafuaaga ua lē pa’au mai ai le alii o Lima Sopoaga i le lē taalo ai i le taaloga ma Iapani i le vaiaso ua mavae.
O le tali lea a Mapusua i se tasi o ofisa faasalalau RugbyPass e uiga i le faatuai ai ona taunuu o Sopoaga i toleniga ma tapenaga a le ‘au a le Manu Samoa faatasi ai ma le taaloga ma Iapani.
O loo i Farani Sopoaga ma lona aiga e tālia ai a latou visa e ulufale ai ma faamautu i Iapani ina ua maua le avanoa mo le ‘au a le Koto Blue Sharks ma o le mafuaaga tonu o lona le auai ai i tapenaga faatasi ma le ‘au lea o loo faagasolo i le taimi nei.
Na ta’ua e Mapusua o loo talosia le mafai ai ona auai o Sopoaga i le taaloga ma Fiti i le faaiuga o le vaiaso ae e le o maua foi lena tulaga ona o le utiuti o le taimi.
“O loo tālia pea le visa mo ia ma si ona aiga e faamautu ai i Iapani, ma o loo matou galulue faatasi pea i ana toleniga ma fonotaga a le ‘au i auala o fesootaiga o loo faaaogaina.
“O loo fai lava ana ia toleniga i Farani o le tulaga tatau lea e tapena ai foi ia pe a mautu ana fuafuaga mo isi foi laasaga o le taleni lakapi ma ou te iloa e tatau ona taalo i le isi taaloga a le Manu Samoa ma Toga i le amataga o le masina fou.”
O le itula e 3 i le afiafi o le Aso Toonai nei lea o le a taaalo ai le ‘au a le atunuu ma le ‘au a Fiti ona sosoo lea o le isi ana taaloga o le vaiaso fou ma le ‘au a Toga e tapenapena ai mo le Ipu a le Lalolagi i Pale i Farani.
O loo tulaga sefulu nei le Manu Samoa i le faatulagaina o ‘au a le Ipu o le Lalolagi ina ua malolo ai Iapani.
