Faailoa e Ausetalia avanoa nofomau mo tagata Samoa ma isi atunuu o le Pasefika

O Samoa ma nisi o atunuu o le Pasefika ua agavaa i se polokalame nofomau i Ausetalia e amata faatino i le masina o Iulai o le tausaga nei.

Ua ta’ua lea polokalame o le Pacific Engagement Visa ma ua faamoemoe e siitia ai le numera o tagata Pasefika e nofomau i lea atunuu.

O tausaga e mafai ona talosaga ai o le 18 i le 45 tausaga o le soifua ma o se isi faitotoa o le a maua ai e tagata i Samoa ma isi motu o le Pasefika avanoa e malaga ma aumau ai i lea atunuu ma saili manuia auā le atiina a’e o aiga, nuu ma ekalesia.

E 3 afe avanoa nofomau ma e le o manino pe vaevae lea aofaiga i atunuu o loo agavaa pe o le a fili tagata e manuia i le aofaiga o talosaga e tuuina atu.

Ua aiaia foi le manaomia o le pepa faigaluega e pei o talosaga nofomau i le quota scheme a Niu Sila lea o loo agavaa ai foi o tatou tagatanuu.