Ua toe o ni vaiaso ona toe a’e lea o fanau mo le toe amatalia o aoaoga o lenei tausaga fou, ma ua faailoa ai e le Matagaluega o Aoga, Taaloga ma Aganuu, aso o le a maua ai le faaiuga o suega o le Samoa School Certificate poo le SSC mo fanau i le vasega Tausaga 12 e maua i le aso 27 o Ianuari, ae o le aso 20 o le masina nei lava e maua ai le faaiuga poo results o le suega o le SSLC mo fanau i le vasega Tausaga 13. O le asō foi lea e maua ai faaiuga o le suega mo fanau i le tausaga valu.
O se tasi o tapenaga a le matagaluega o aoga, taaloga ma aganuu ua faailoa lautele o le toe autaluina ma iloilo le curriculum poo le faiga o aoaoga i aoga tulagalua lea o loo valaauina ai faiaoga o loo feagai ma fanau i tulagalua e auai i ia iloiloga e amata faagasolo mai le aso 16 o Ianuari e oo i le aso 19.
O se feiloaiga a tusitala ma le Ofisia Sili fou o le Matagaluega na ia faailoa ai nisi o tapenaga mo le toe faatulagaina o faiga faavae e lima taitaiina ai le aoaoina o fanau a le atunuu i se taumafaiga e fofo ai nisi o faafitauli sa ia matauina a o lei pale atu e tauave le vaaia o lea matagaluega tāua a le Malo.
