O lea ua faailoa e le ofisa o le Fono a Malo o le Taupulega i auala o fesoota’iga, nisi o polokalame ua tapena e afio mai le Tupu o Peletania ma lana Masiofo, pe a malaga mai i Samoa i le masina fou.
O le a totō e le Tupu Lana Maiesetete o Salesa III se laau i se togalaau poo se botanical garden, ma o le a faaigoa ai o le Togalaau o le Tupu poo le King’s Garden.
O le a afea foi e lea faigamalaga mamalu se maota o se faafeagaiga o loo faia ai se a’oga a faifeau, lea o le a molimauina ai e le masiofo o Camilla, le a’oa’oina o fanau e lē gata i le tusitusi ae o le faitau tusi.
O le a asia foi se nofoaga faasao o togatogo ma o se tasi lea o polokalame o le faigamalaga o le a mafai ona faasoa atu ai i latou o pulea ma vaaia ia nofoaga faasao i ni aafiaga o feagai ai ona o suiga o le tau.
E iai se fonotaga e autū i faiga ma gaioiga faapisinisi poo se Business Forum o le a faia a o lei amatalia le fono a Ulu o Malo o le Taupulega, o le a muamua auai atu iai le Tupu o Salesa, ae o lana masiofo ua faatulaga sana asiasiga i le nofoaga o loo tausia ma vaaia ai fanau ua sauāina.
O le faato’ā malaga mai lea i Samoa o le Tupu o Salesa, ae o lona uso o Pelenise Eteuati sa malaga mai e pei ona faaigoa ai le tasi o malae a le malo i le motu o Savaii.
Sa malaga mai foi ona tuaa le Tupu Tamaitai o Elisapeta II ma lona tuaa tamā o Pelenise Filipo, ina ua faailoga le iupeli siliva poo le 25 tausaga talu ona avea Elisapeta II ma Tupu o Peletania tele ma ia tauaveina foi le tulaga o le faauluuluga o Malo o le Taupulega.
O le aso 11 o Fepuari i le tausaga e 1977 na afea ai Samoa e tuaa o le Tupu o Salesa III, tusa ua 47 ai nei tausaga talu ai.
