Ua amata faagaioi nei le atinae o le Biogas poo se taumafaiga e maua ai le kesi mo ogaumu e gaosi mai lea i otaota lafoai o meatuaolō faapea taumafa ua lafoai i totonu o le afioaga o Vaisala i Savaii.
O se tasi lea o atinae o loo faagaioi e le Matagaluega o Punaoa Faalenatura ma le Siosiomaga ua galulue ai ma le lala o le malo Aufaatasi le UNDP.
O le masina o Aukuso na amata ai ona faatino galuega o lea taumafaiga o le masina nei o Oketopa na maea ai. O se atinae foi faapea na tatala ma amata faaoga i le nofoaga autu i le laumua lea o le Ekalesia Metotisi i Faleula.
O se taumafaiga ua taulai i le faaaogaina o le malosiaga faafouina poo le renewable energy e pei o le eletise e maua mai i le la faapea le matagi.
O le afioaga o Vaisala e pei ona faailoa ai i le pepa o faamatalaga ua talafeagai lelei ma manaoga o le atinae ona e tele atinae o meatuāolō e maua ai otaota e gaosi ai le kesi e ola ai le ogaumu ma o le a tuuitiita ai le tupe alu.
