O le vaiaso nei ua faagasolo ai e le Matagaluega o Leoleo ma Falepuipui ma le Ola Toefuataina se polokalame mo le faafouina o laisene a laau malosi ma faailoa o polokalame fesoasoani i le tele o le popolega i mataupu tau laau malosi e lē faatagaina i totonu o le atunuu. 

Na amata mai lenei polokalame i le amataga o le vaiaso i ofisa o leoleo i le motu tele i Salafai i Tuasivi, Fagamalo ma Asau ma o le a faaauau seia oo i le Aso Toonai. 

Ta’ua e se tasi o Sui Komesina i le vaega o le National Operations ia Muliaga Lorraine Lees o nei polokalame e faamoemoe ina ia mafai ona a’oa’oina i latou o loo iai laau malosi faatulafonoina ma le tāua o le puipuimalu o nei auupega. 

O se polokalame na amatamea ai le Minisita o Leoleo, Faualo Lefau Harry Schuster ma le komesina o Leoleo ia Auapaau Logoitino Filipo ina ia mautinoa le faaaogā o lenei auaunaga i tagata o le atunuu i le motu tele i Salafai.