O loo faagasolo i le vaiaso nei faatalanoaga a nisi o itumalo o loo taofia a latou poloketi o le miliona ma le Komiti o le poloketi faapea ai le Matagaluega o Tina ma Tamaitai Atinae o Nuu ma Agafesootai e ala i le Afioga i le Alii Minisita ia Leota Laki Lamositele.
O loo iai le to’a i poloketi a nisi itumalo ona o le lē galulue faatasi, aemaise ai o le eseese o manaoga o nisi i le faaaogaina o le miliona, faapea ai le lē mulimulitaia o le taiala ua uma ona tuuina mai e le Matagaluega.
A o faia ai la ia faatalanoaga ae ua mae’a tuuina atu nisi o vaegatupe o le poloketi lenei i nisi o itumalo e pei ona molimauina ai poloketi o tanevai mo Vaimauga 2, aua aso leaga ma mugala, ua tufatufaina atu ai le tai $50,000 e faatau ai tanevai.
O laau suisui poloketi a le afioaga o Moataa aua le galuega a tina, o le afioaga o Vaigaga ua faatino la latou poloketi i teuga aai. Ua mae’a tufatufa e Faleata 2 meafaigaluega mo faatoaga.
O le afioaga o Tulaele ua manatu e fai a latou faleie ma nofoa e totogi pe a faaaoga, o se poloketi e fesoasoani i le lautele i taimi o faalavelave ma faamoemoega o aiga, nuu ma ekalesia.
O Falealupo ua tali le mafatiaga o fanau e tau saili auala e agai ai i aoga ma fela’ua’iga a lea afioaga ina ua faatau le pasi o la latou lea poloketi.
E tusa ma le 27 tagata taitoatasi, ma le toatolu aiga ua faia a latou poloketi o pisinisi laiti mai se vaega o le miliona ua faamatuu atu i o latou itumalo.
Ae o le faaiuga o le vaiaso ua mavae na tatala ai Fono Faavae a nisi o itumalo e aofia ai le Itumalo o Vaa o Fonoti, o loo tulai mai ai se tasi sa tauva i le fu’a a le HRPP, lea e lei leva nei ona faamavae e fia avea ma faipule tutoatasi, faapea ai foi ma le Itumalo o Faleata 1 sa molimauina lea i le Aso Toonai ua mave atu.fcc
